A Oficina Técnica Next Generation Galicia Food aborda as condicións do PERTE agroalimentario

• O subdirector xeral de Áreas e Programas Estratéxicos do Ministerio de Industria, Comercio e Turismo avanzou os primeiros requisitos provisionais para que as industrias agroalimentarias poidan optar aos 400 millóns de euros que compoñen o eixo do PERTE Agroalimentario destinado ao fortalecemento industrial

• A Oficina Técnica de Clusaga é a canle para que as empresas galegas poidan optar a estes fondos europeos e mobilizar proxectos tractores que se inclúan no PERTE Agroalimentario

• O obxectivo é armar unha candidatura galega conxunta do sector que opte aos fondos deste programa

Baixo o título “PERTE agroalimentario: mecanismo vertebrador e tractor do impulso á transformación sectorial” a Oficina Técnica Next Generation Galicia Food celebrou esta semana unha sesión dixital na que se desvelaron ao sector as primeiras condicións deste programa de axudas europeas dotadas con máis de 1.000 millóns de euros nas que está traballando o Goberno central. En concreto, a xornada centrouse no eixo 1 do PERTE, aquel destinado ao fortalecemento industrial do sector agroalimentario (non incluiría a produtores nin distribución) e que contará con 400 millóns de euros de orzamento.

Para debullar este programa contouse co subdirector xeral de Áreas e Programas Estratéxicos do Ministerio de Industria, Comercio e Turismo, Ramón Herrero, que anunciou as primeiras condicións da convocatoria como, por exemplo, que será un requisito imprescindible para optar a estas axudas que as empresas se presenten como agrupacións sen personalidade xurídica propia que teñan establecido con anterioridade un acordo de agrupación. De aí que o responsable estatal recomendase ás compañías que, mentres o ministerio está redactando as bases deste programa, algo que prolongará durante todo o primeiro semestre do ano, vaian pensando en coalicións para optar a estas subvencións e préstamos.

Para ir avanzando nesta busca de socios e valorando as iniciativas que se poderán presentar, as empresas galegas contarán coa axuda da Oficina Técnica Next Generation Galicia Food, unha entidade impulsada polo Clúster Alimentario de Galicia (Clusaga) e a Xunta de Galicia para mobilizar proxectos tractores que opten a estes fondos europeos, ao Plan estatal de Recuperación, Transformación e Resiliencia e, en concreto, ao PERTE agroalimentario, co obxectivo de armar unha proposta galega conxunta.

De feito, no webinar interviñeron o xerente de Clusaga, Roberto Alonso; a socia do Sector Público de Ernst & Young e directora da oficina de EY Galicia, Marta Fernández; e o subdirector de Proxectos Tractores do Instituto Galego de Promoción Económica (IGAPE), Santiago Álvarez. Durante a súa intervención, Roberto Alonso sinalou que “estamos ante unha oportunidade única para apoiar a transición dixital e ecolóxica” para que o sector siga sendo competitivo no mercado global.

Prazos provisionais

O subdirector xeral avanzou os prazos provisionais que se manexan a día de hoxe desde o Ministerio. O obxectivo, segundo Herrero, é rematar a redacción das bases neste primeiro semestre e, a falta de que as condicións se concreten neste documento, adiantou que o prazo de presentación de solicitudes e, unha vez se coñeza a resolución, haberá uns 30 meses para executar os proxectos tractores seleccionados co 30 de setembro de 2025 como límite máximo. Desde Galicia Food destacan que se trata dunha oportunidade irrepetible xa que haberá unha única convocatoria no 2022, que se executará entre o 2023 e o 2025.

Durante o seu relatorio, Herrero explicou tamén o tipo de actuacións que se poderán apoiar en cada un dos tres bloques nos que se divide o eixo 1 do PERTE agroalimentario: competitividade, sustentabilidade e trazabilidade e seguridade alimentaria. Todos os proxectos tractores que se presenten deben incluír accións en dous destes tres bloques e un deles debe ser obrigatoriamente o da trazabilidade.

Para impulsar a competitividade búscanse actuacións que avancen na dixitalización como a automatización dos procesos, a implantación da robótica ou de solucións de intelixencia artificial. Entre os proxectos de sustentabilidade inclúense os plans de xestión ambiental conxunta.

En canto ao tipo de axudas, ademais de subvencións, a maior parte dos 400 millóns de euros (ata 250 millóns) repartiranse en préstamos a interese cero con amortización a 10 anos incluíndo tres de carencia. Será obrigatorio cumprir co denominado efecto incentivador marcado pola UE, é dicir, que o proxecto non pode ter empezado antes de facer a solicitude.

Un centenar de participantes

Preto dun centenar de compañías e entidades participaron neste webinar organizado pola Oficina Técnica Next Generation Galicia Food para comezar a aclarar conceptos ao redor deste programa que ten como obxectivo a recuperación e transformación da cadea agroalimentaria, impulsando a súa modernización e dixitalización.

Desde a Oficina Técnica convídase a todas as empresas galegas a valorar a posibilidade de presentar ideas de proxectos e lémbrase que esta entidade está á súa disposición para asesorar e resolver calquera dúbida no proceso.

En particular, entre as labores desta oficina técnica está a vixilancia e difusión dos fondos de investimento, a análise de convocatorias e programas de financiación, a identificación de oportunidades e articulación dos proxectos tractores e a asistencia e soporte na preparación de propostas.